心情低氣壓

近日認識一個新的名詞──「心情低氣壓」，正好派上用場。

***************

國際地理頻度特約：《瞬間天氣預報》
（資料由「地下心情天文台」提供）

「雖正值北半球的一月隆冬時間，但近日於本港上空發現一股低壓槽，主要籠罩新界東及港島東地區，偶然於港島西出現。受影響地區將會出現不穩定天氣，包括怒火引致的突然氣溫急升、頹喪和怨念帶來的強烈刺骨寒風（陣風風速達暴風程度）、懊惱和殘酷現實引發的極厚雲層和陰霾。根據衛星圖顯示，低壓槽走向飄忽，暫時未能準確預測未來數日的天氣，本網誌將不時為你報道最新氣象消息……」

***************

為答謝各界支持，並迎接喜慶金豬年，同場加映：

【本網誌專訊】經記者連日的追訪跟查探，終發現引致不穩定天氣的可疑低壓槽或由一名市民造成，為探求真相，記者與該名市民多番討價還價後，終套出點點口風：

「老師使唔使咁絕情呀？都最後一堂啦，好應該顧及下人地感受。我已經好俾心機剪架啦，使唔使用我嗰個傳晒俾全班同學睇當做反面教材！我知道我剪得唔好，但已經盡晒力，問心無愧。我剪得差，你話我知錯邊度就夠啦，然後應該指導返我正確的剪法和技巧，但淨係話我錯，又唔講我錯乜！你已經宣佈我份劵得19/50，仲要攞我份劵周圍晒俾人睇！激氣！」

記者正欲開口發問之際，已被打斷：「我以前都攞過19/50的『佳績』啦！（編按：“19 over 50”，即50滿分只得19分）我盡晒力，都係得咁樣，無辦法，唔會怨，只有自己努力D，再努力D，請教其他人，搵出自己衰乜……」

記者正想問究竟「剪」甚麼東西時，該市民已在一秒間轉變話題：「仲有嗰個大叔，越來越唔想上佢堂！其他人做唔到某D動作，就細心指點，我做唔到就『怒睥』我！我做得好的動作，不但一句comment都無，仲眼尾都唔望下我！>_< 我自問無得罪過大叔……」

「返到公司，諗極都無好嘅idea，諗嚟諗去，大半日都過左，乜都諗唔到…… -_-''' 又要趕住交貨，嗚……滿腦子混亂的思緒……快D俾我諗到……快D俾我諗到啦……嗚嗚……」該市民從最初口沫橫飛地炮轟，直到此刻便漸漸顯露頹喪之色。

「然後又收到一個電郵，迫使我不得不面對一直逃避不願去想的現實問題，這是多麼殘酷的現實。猶如當頭棒喝，不期然想到很多很多…… #_#」

忽然，天色昏暗起來，颳起陣陣凜冽寒風，周遭的環境變化肯定了記者的猜測，正欲舉機拍下現場實況，惟該市民已逃逸無蹤。

***************

哈哈，我學懂運用「心情低氣壓」這個新term啦。內容如有雷同，實屬巧合。